Monday, July 27, 2009

ചോദിക്കപ്പെടാതെ പോയ ചോദ്യങ്ങള്‍

മഴ പറയുന്നു
ഒര്‍മകളെ കുറിച്ച്‌ ഞങ്ങളോട്‌ ചോദിക്കരുത്‌
അതില്‍ ആരൊക്കെ നനഞ്ഞൊലിച്ചു പോയെന്ന്‌
ഞങ്ങള്‍ക്കറിയില്ല
പുഴ പറയുന്നു
കടവുകളെ കുറിച്ച്‌ ഞങ്ങളോട്‌ ചോദിക്കരുത്‌
അവിടെ ആരൊക്കെ കാത്തു നിന്നിരുന്നെന്നൊ
ആരൊക്കെ എന്നന്നേയ്ക്കുമായ്‌ ഒറ്റപ്പെട്ടുപോയെന്നൊ
ഞങ്ങള്‍ക്കറിയില്ല
കടല്‍ പറയുന്നു
തുറമുഖങ്ങളെ കുറിച്ചും കരകാണായാത്രകളെ കുറിച്ചും
ഞങ്ങളോട്‌ ചോദിക്കരുത്‌
എത്രയെത്ര അധിനിവേശങ്ങള്‍ നടന്നെന്നൊ
എന്തൊക്കെ കൊള്ളയടിക്കപ്പെട്ടെന്നൊ ഞങ്ങള്‍ക്കറിയില്ല
എന്നിട്ടും ജീവിതത്തിലും ചരിത്രത്തിലുമെല്ലാം
ചോദിക്കപ്പെടാതെ പോയ ചോദ്യങ്ങളിലൊക്കെ
നനഞ്ഞൊലിച്ചു കൊണ്ടേയിരിക്കുന്നു ഒരു മഴ
ഒഴുകി നിറഞ്ഞു കൊണ്ടേയിരിക്കുന്നു ഒരു പുഴ
അലയടിച്ചു കൊണ്ടേയിരിക്കുന്നു ഒരു കടല്‍
ബ്ലോത്രം വാരാന്ത്യ പതിപ്പില്‍ അടിച്ചു വന്നത്‌