വീട്‌

തുറക്കും തുറക്കും എന്ന പ്രതീക്ഷയാണ്‌ വാതില്‍
ഫ്രെയിം ചെയ്തു വെച്ച കാഴ്ചയാണ്‌ ജനല്‍
പരസ്പരം അപരിചിതരാക്കുന്ന മുറിവുകളുടെ
നിശബ്ദ ഭാഷയാണ്‌ ഓരോ മുറിയും
ഭൂമിക്കും ജീവിതത്തിനുമിടയില്‍ സ്വാര്‍ത്ഥതയുടെ
സമവാക്യങ്ങള്‍ കൊണ്ട്‌ പടുത്ത
ഗണിത രൂപങ്ങളാണ്‌ പടികള്‍
പല സത്യങ്ങളെ ഒരൊറ്റ നുണയുടെ താഴെ
കൊണ്ടുവരുമൊരു ബോധമാണ്‌ മേല്‍ക്കൂര
അതിനുള്ളില്‍ തളം കെട്ടികിടക്കുന്ന നിശബ്ദതയ്ക്ക്‌ തിന്നാന്‍
വിരസതകളെ വേവിച്ചെടുക്കുമൊരടുക്കള